भोवती धेनूंचा समुदाव | मध्ये शोभे सद्गुरुराव | वाटे दुजा वासुदेव | वृंदावनी उभा असे ||

असो गोसेवा ऐसी | सद्गुरू करिती आदरेसी |

करविती बोधिती सकलांसी | गोशुश्रूषा करावी ||

एकदा ऐसा प्रकार घडला | खाटिक आले गोंदावलीला |

संगे घेवोनि धेनूला | वधायासी चालिले ||

मार्गे गोंदावलीस येता | वार्ता कळली सद्गुरुनाथा |

पाचारूनि तया समस्तां | वदती गाई न न्याव्या ||

यांचे मोल आम्ही देतो | आदरे सर्व संरक्षितो |

तुम्हांसीही ऐसे कथितो | मायवध न करावा ||

चिंताग्रस्त झाल्या दिसती| पुढील भविष्य आणोनि चित्ती|

दीनवदने करुणा भाकती| हाय हाय युगधर्म||

कसाई वदती निष्ठुर | अज्ञानी पशु हे साचार |

कोठला या ज्ञानविचार | असेल तरी दावावे ||

निर्बंधन करूनि चारा | घालितो तुम्ही हाका मारा |

जरी असेल ज्ञानझरा | तरी धावोन येतील ||

धावोन येता समस्त | सोडून देऊ नेमस्त |

ना तरी शीघ्र वधाप्रत | नेऊ सत्य जाणावे ||

सद्गुरू तया रुकार देती | दुष्ट कसाई तैसे करिती |

दूर राहोन पाचारिती | नामे घेवोन गुरुराव ||

'गंगे यमुने गोदावरी | तुंगे कृष्णे या सत्वरी |

कपिले वारणे आणि मधुरी | दासासमीप धावा गे ||

ऐसे वदता ते अवसरी | धावोन आली ती सारी |

कोणी शेपूट उभारी | कोणी फोडी हंबरडे ||

चरण चाटोन क्षालन करिती | कोणी मुखाकडे पाहती |

कांही उगाच हुंगिती | सद्गुरूराजयांसी ||

भोवती धेनूंचा समुदाव | मध्ये शोभे सद्गुरुराव |

वाटे दुजा वासुदेव | वृंदावनी उभा असे ||

(श्रीसद्गुरू लीलामृतातून)