साक्षित्वासाठी सगुणोपासना ~ परमपूज्य बाबा बेलसरे

श्रीराम! अध्यात्मामध्ये काय शिकायचं, तर आपल्या देहाला वेगळेपणाने पाहायला शिकायचं. मी काही हा देह नव्हे, ही जाणीव केव्हा होईल, तर या देहाच्या पलीकडे असणारं आपलं जे स्वरूप आहे, त्याच्याशी आपलं मन चिकटलं म्हणजे होईल. त्याला तुम्ही आत्मस्वरूप, परमात्मस्वरूप काहीही म्हणा. इथे सद्गुरूंची मदत फार होते आणि सगुणोपासना फार उपयोगी पडते. सगुणोपासनेचं महत्त्व असं आहे की आपण ज्या रूपाचं ध्यान करतो ते आपल्या सूक्ष्म देहामध्ये इतकं भरतं, की तादात्म्य होतं. मग तुम्ही जाल तिथे ते येतं. तुकाराम महाराज म्हणाले, "तुका म्हणे मज आहे हा भरवसा | विठ्ठल सरिसा चालतसे ||" माझ्या सूक्ष्मदेहाबरोबर विठ्ठल - भगवंत येतो हा अनुभव नुसत्या नामाने सुद्धा येतो ! 

~~ परमपूज्य बाबा बेलसरे (ज्ञानेश्वरी खंड ८ वा)